सिमरा । सामाजिक सञ्जालमा आएको एउटा आकर्षक सन्देश, विदेशमा राम्रो रोजगारीको आश्वासन वा छोटो समयमै धेरै कमाउने प्रलोभन—यस्ता प्रस्ताव सामान्य लाग्न सक्छन्। तर, यही माध्यमबाट मानिसहरू मानव बेचबिखनको जालमा फस्ने जोखिम पछिल्लो समय बढ्दै गएको प्रहरीले जनाएको छ।मानव बेचबिखनविरुद्धको २०औँ राष्ट्रिय दिवसको अवसरमा इलाका प्रहरी कार्यालय सिमराले जीतपुरसिमरा उपमहानगरपालिका–८ गमरगावामा समुदायस्तरीय सचेतना कार्यक्रम आयोजना गर्दै स्थानीयलाई यस्ता जोखिमबारे सचेत गराएको हो।
शनिबार आयोजित एक दिने कार्यक्रममा ‘प्रविधिको सही प्रयोग र सजगताः मानव बेचबिखनरहित राष्ट्र निर्माणमा ऐक्यबद्धता’ भन्ने मूल नारासहित मानव बेचबिखनका बदलिँदा स्वरूप, सम्भावित जोखिम र त्यसबाट बच्ने उपायबारे जानकारी दिइएको थियो।कार्यक्रममा इलाका प्रहरी कार्यालय सिमराका प्रमुख प्रहरी नायब उपरीक्षक दयाकृष्ण भट्टले समयसँगै मानव बेचबिखनका तरिका पनि परिवर्तन हुँदै गएको बताए। विशेषगरी वैदेशिक रोजगारीको प्रलोभन, सामाजिक सञ्जालमार्फत हुने सम्पर्क र आकर्षक आम्दानीको आश्वासन देखाएर मानिसलाई ठगी तथा बेचबिखनको जोखिममा पार्ने गतिविधि बढिरहेको उनले बताए।
प्रविधिको गलत प्रयोग गर्दै सक्रिय गिरोहबाट सर्वसाधारण जोखिममा पर्न सक्ने भएकाले अपरिचित व्यक्तिबाट आउने शंकास्पद प्रस्ताव, रोजगारीका विज्ञापन वा अन्य गतिविधिप्रति सचेत रहन भट्टले आग्रह गरे।उनले मानव बेचबिखनको जोखिम पहिचान गर्ने संकेत, सम्भावित घटनाबाट जोगिने उपाय तथा घटना हुनुअघि नै रोकथाम गर्न सकिने विषयमा पनि स्थानीयलाई जानकारी गराए।‘मानव बेचबिखन नियन्त्रण प्रहरीको प्रयासले मात्र सम्भव हुँदैन,’ भट्टले भने, ‘समुदायका नागरिक पनि सचेत भएर शंकास्पद गतिविधिबारे समयमै प्रहरी वा सम्बन्धित निकायलाई जानकारी गराउनुपर्छ।’उनका अनुसार प्रहरी र समुदायबीच सूचना आदानप्रदान तथा सहकार्य बलियो बनाउन सके सम्भावित घटना समयमै पहिचान गरी रोक्न सकिन्छ।
कार्यक्रममा जीतपुरसिमरा उपमहानगरपालिका–८ का वडाध्यक्ष शिवशंकर कुशवाहाले ग्रामीण क्षेत्रका सोझासाझा तथा पर्याप्त जानकारी नभएका नागरिक मानव बेचबिखनको जोखिममा पर्न सक्ने बताए।समुदायमै पुगेर सञ्चालन गरिने यस्ता सचेतनामूलक कार्यक्रमले नागरिकलाई सम्भावित जोखिम पहिचान गर्न र आफू तथा आफ्ना परिवारका सदस्यलाई सुरक्षित राख्न सहयोग पुग्ने उनको भनाइ थियो।सचेतना कार्यक्रममा इलाका प्रहरी कार्यालय सिमराका प्रहरी वरिष्ठ नायब निरीक्षक रुपेश थपलिया, इलाका प्रहरी कार्यालय जीतपुरका प्रहरी वरिष्ठ नायब निरीक्षक उमेश निरौला, पूर्ववडाध्यक्ष रामबाबु पटेल, वडासदस्य गंगा पटेलसहित जनप्रतिनिधि तथा स्थानीयवासीको सहभागिता रहेको थियो।कार्यक्रममा वक्ताहरूले मानव बेचबिखन रोक्न कानुन र प्रहरीको भूमिका मात्रै पर्याप्त नहुने भन्दै परिवार, समुदाय, विद्यालय र स्थानीय तहबीच निरन्तर सचेतना र सहकार्य आवश्यक रहेकोमा जोड दिएका थिए।
