बारा । नेपाली कांग्रेसको १५औँ महाधिवेशनअन्तर्गत बारामा वडा अधिवेशनको तयारी तीव्र पारिएको छ। जिल्लाका १६७ वटै वडामा हुने अधिवेशनलाई व्यवस्थित बनाउन नेपाली कांग्रेस बारा जिल्ला कार्यसमितिले विस्तारित बैठकमार्फत आवश्यक तयारी, निर्वाचन प्रक्रिया र संगठन परिचालनका विषयमा छलफल गरेको हो।
कलैयास्थित करणराज होटलमा जिल्ला सभापति मनोज भट्टको अध्यक्षतामा बसेको बैठकमा वडा तहदेखि पार्टीका गतिविधि सक्रिय बनाउने, नेता–कार्यकर्तालाई परिचालन गर्ने तथा विभिन्न तहका कार्यसमितिबीच समन्वय कायम गर्ने विषयमा छलफल भएको थियो।
बैठकमा वडा तथा स्थानीय तहका अधिवेशनका लागि आवश्यक तयारी, कार्यकर्ताको सहभागिता, संगठन विस्तार र अधिवेशनलाई व्यवस्थित रूपमा सम्पन्न गर्ने उपायबारे सहभागी नेताहरूले धारणा राखेका थिए। अधिवेशनका क्रममा पार्टीका विभिन्न तहबीच आपसी सहकार्य र समन्वयलाई प्राथमिकता दिनुपर्नेमा समेत जोड दिइएको थियो।
निर्वाचन प्रक्रिया र आचारसंहिताबारे जानकारी
विस्तारित बैठकमा केन्द्रीय प्रतिनिधिका रूपमा आएका मुख्य निर्वाचन अधिकृत कृष्णप्रसाद सापकोटाले सहभागीहरूलाई निर्वाचन प्रक्रिया, आचारसंहिता, निर्वाचनसम्बन्धी नियम तथा अपनाउनुपर्ने प्रक्रियाबारे जानकारी गराएका थिए।
नेपाली कांग्रेसको पछिल्लो आधिकारिक कार्यतालिकाअनुसार वडा अधिवेशन २०८३ असोज ३ र ४ गते स्थानीय अनुकूलताअनुसार सम्पन्न गर्ने कार्यक्रम छ। यस क्रममा वडा कार्यसमिति निर्वाचन तथा क्षेत्रीय प्रतिनिधि चयन गरिने उल्लेख छ।
अधिवेशनसँगै संगठन विस्तारमा जोड
बैठकले अधिवेशनलाई केन्द्रमा राखेर जिल्लाका सबै वडामा संगठनात्मक गतिविधि बढाउने तथा नेता–कार्यकर्तालाई सक्रिय रूपमा परिचालन गर्ने विषयलाई प्राथमिकतामा राखेको छ।
स्थानीय तहमा कार्यकर्ताको सहभागिता बढाउने, संगठनलाई थप व्यवस्थित बनाउने र आगामी तहका अधिवेशनका लागि आवश्यक समन्वय कायम गर्ने विषयमा पनि बैठकमा छलफल भएको जनाइएको छ।
कांग्रेसको कार्यतालिकाअनुसार वडा अधिवेशनपछि असोज ७ गते गाउँ–नगरपालिका अधिवेशन, असोज १० गते प्रदेश सभा तथा प्रतिनिधिसभा क्षेत्रीय अधिवेशन र असोज १६ देखि १९ गतेसम्म केन्द्रीय महाधिवेशन गर्ने कार्यक्रम रहेको छ। जिल्ला तथा प्रदेश अधिवेशनको समयतालिका भने दोस्रो चरणमा प्रकाशित गरिने पार्टीले जनाएको छ। (नेपाली कांग्रेस)
नेताहरूको सहभागिता
बैठकमा केन्द्रीय सहमहामन्त्री फरमुल्लाह मन्सूर प्रमुख अतिथिका रूपमा सहभागी भएका थिए। केन्द्रीय सदस्यहरू मधु शाही ठकुरी, रामानन्द यादव, शम्भु बुढाथोकी र ममता शर्मा तथा संविधानसभा सदस्यहरू डा. शोभाकर पराजुली र लालबाबु सिंहको समेत उपस्थिति थियो।
त्यस्तै, प्रदेश कार्यवाहक सभापति चन्द्रशेखर यादव, जिल्ला उपसभापति अमिरी पाल, सचिव भैयाराम यादव, क्षेत्र नम्बर १ का सभापति विजयशंकर यादव, क्षेत्र नम्बर ३ का सभापति प्रभात चौरसिया, महागढीमाई नगरपालिकाका मेयर उपेन्द्रप्रसाद यादवलगायत जिल्लाका नेता तथा कार्यकर्ताहरू बैठकमा सहभागी थिए।
कार्यक्रम जिल्ला सचिव राजेश रौनियारले सञ्चालन गरेका थिए भने जिल्ला सदस्य तथा कांग्रेस नेतृ प्रियंका दासले स्वागत गरेकी थिइन्। बैठकसम्बन्धी जानकारी कांग्रेस क्षेत्र नं. ४ (ख) का सभापति लोकेश सिंहले दिएका हुन्।
