बाँदर धपाउने क्रममा भरुवा बन्दुकको छर्रा लागेर एक जना घाइते, दुई नाल बन्दुकसहित एक जना पक्राउ

बारा ।बाराको जीतपुरसिमरा उपमहानगरपालिका–१६ धर्मनगरमा भरुवा बन्दुकको छर्रा लागेर एक जना घाइते भएका छन् । बुधबार साँझ करिब ६ः३५ बजे स्थानीय ३० वर्षीय गोविन्द ठाडा मगरले बाँदर धपाउने क्रममा भरुवा बन्दुक पड्काउँदा निस्किएको छर्रा लागेर सोही स्थानका ३२/३३ वर्षीय उत्तम रमौली मगर घाइते भएका हुन् । घाइते रमौली मगरको वीरगञ्जस्थित नेपाल मेडिसिटी बयोधा अस्पतालमा उपचार भइरहेको जिल्ला प्रहरी कार्यालय बाराले जनाएको छ । घटनाबारे साँझ ६ः५० बजे जानकारी प्राप्त हुनासाथ जिल्ला प्रहरी कार्यालय बाराका प्रहरी नायब उपरीक्षक मिनबहादुर घलेको कमाण्डमा ७ जना, अस्थायी प्रहरी पोस्ट डुमरवानाबाट प्रहरी सहायक निरीक्षक सञ्जयकुमार वर्माको कमाण्डमा २ जना र इलाका प्रहरी कार्यालय सिमराबाट प्रहरी नायब उपरीक्षक दायकृष्ण भट्टको कमाण्डमा २२ जनाको प्रहरी टोली घटनास्थलमा खटिएको थियो । प्रहरी टोलीले घटनामा संलग्न गोविन्द ठाडा मगरलाई दुई नाल भरुवा बन्दुकसहित नियन्त्रणमा लिएको छ ।पक्राउ परेका मगरमाथि इलाका प्रहरी कार्यालय सिमराबाट थप अनुसन्धान भइरहेको जिल्ला प्रहरी कार्यालय बाराले जनाएको छ।